Şəbəkənizin kiber müdafiəsi

SOC as a Service yönləndirilmiş təhlükənin aşkarlanaraq cavab tədbirlərinin görülməsi, sistemin 24/7 izlənməsi, təhdid kəşfiyyatı və təhlükəsizlik boşluqlarının idarə olunması xidmətləri verir.

Təhlükəsizlik Əməliyyatları Mərkəzi şəbəkələrdə, serverlərdə, verilənlər bazasında, proqramlarda, vebsaytlarda və digər sistemlərdə fəaliyyətə nəzarət edir, təhlükəsizlik pozuntusunu araşdırırlar. Onlar təhlükəsizlik divarının qorunması, möhkəmləndirilməsi və hadisə baş verdikdə məsələnin aydınlaşdırılması ilə məşğuldurlar.

Sadəcə tək bir Kiber Təhlükəsizlik Əməliyyatları Mərkəzi ilə əməkdaşlıq edərək həm vaxtınıza, həm də maddi vəsaitinizə qənaət edə bilərsiniz.

Penetration testing mobil tətbiqlərdə, infrastrukturda, veb tətbiq və servislərdə mövcud təhlükəsizlik boşluqlarının test edilərək aşkarlanması və risklərin müəyyən edilməsi xidmətidir.

“Pentest” şirkətlər və qurumlar tərəfindən sistemlərinin sınaqdan keçirilərək təhlükəsiz olub-olmadığını öyrənmək üçün gerçəkləşdirilir. Bu yolla şirkətlər sistemlərindəki açıq hissələrdən xəbərdar olur və bu hissələrdəki təhlükəsizlik boşluqlarını aradan qaldırırlar.

“Pentest” 3 yolla həyata keçirilir:

Qara qutu. Bu test zamanı sistemlər haqqında heç bir məlumat paylaşılmır. Test ictimaiyyətə açıq olan məlumatlarla həyata keçirilir;
Ağ qutu. Bu testdə şirkətdəki əməliyyat sistemi haqqında tam məlumat verilir;
Boz qutu. Bu test isə ağ və qara qutunun ortasındadır. Test cihazına sistem haqqında icazəsiz istifadəçinin bildiyi məlumat və imtiyazlar verilir.

Secure Code Review veb və mobil tətbiqlərə aid mənbə kodlarının təhlükəsizlik analizi, boşluqların aşkarlanması xidmətidir. Bu, proqram təminatının hazırlanması prosesini sürətləndirmək, kod keyfiyyətini yaxşılaşdırmaq, səhvləri və təhlükəsizlik zəifliklərini aşkar edərək müvafiq həllər təklif etmək baxımından çox effektiv bir üsuldur.

Təhlükəsiz Kod Baxışı, bir tətbiqin mənbə kodunu araşdıran manual (əl ilə) və ya avtomatlaşdırılmış prosesdir. Bu araşdırmanın əsas məqsədi hər hansı təhlükəsizlik problemi və yaxud zəifliyi müəyyən etməkdir. Bu prosesdə xüsusi olaraq məntiq səhvlərinə baxılır.

Əl ilə baxış yüksək səviyyəli və ya daha təcrübəli tərtibatçı tərəfindən bütün kod bazasının hərtərəfli nəzərdən keçirilməsini əhatə edir.

Avtomatlaşdırılmış baxış prosesi, problemli kodu tapmaq üçün əvvəlcədən müəyyən edilmiş qaydalardan istifadə edərək, tətbiqin mənbə kodunun nəzərdən keçirilmə prosesidir. Avtomatlaşdırılmış baxış prosesi manual baxışdan daha sürətlidir. Lakin manual baxış prosesində kodlaşdırma qərarlarının konteksti aydınlaşdırılır. Bu baxış prosesi daha stratejidir və konkret məsələyə baxır.

Adversary Simulation real kibercinayətkar qruplaşmaların istifadə etdiyi texnikalara əsaslanan kiber hücumların simulyasiyası xidmətidir. Təhdid Simulyasiyasının əsas hədəfi qarşılaşıla bilən məqsədli hücumlara qarşı şəbəkə müdafiəsi hazırlamaqdır. Bu xidmətdə “Qırmızı Komanda”, “Mavi Komanda” və “Bənövşəyi Komanda”-dan bəhs olunur.

Qırmızı Komanda hücumu planlaşdırmaq və həyata keçirmək üçün mümkün yolların araşdırılmasında öz təcrübə sahələrindən istifadə edir. Beləliklə, potensial hücumçuların düşüncələrini mənimsəyərək hərəkət edilir.

Mavi Komanda həm həqiqi hücumçulara, həm də Qırmızı Komandaya
qarşı müdafiəni təmin edir. Onlar əksər əməliyyatlarda standart təhlükəsizlik qruplarından ayrılmalıdır.

Bənövşəyi Komanda, Qırmızı Komanda və Mavi Komandanın əməkdaşlıdır. Onlar birlikdə işlədikdə hər ikisinin bacarıqları və prosesləri gücləndirilir. Mavi Komanda Qırmızı Komandanın simulyasiya etdiyi hücumları aşkarlamağa, qarşısını alıb yumşaltmağa çalışır. Hər bir komanda təşkilatın təhlükəsizliyini təmin etmək üçün sərhədləri aşmağa çalışır.

Rəqəmsal istintaq xidməti baş vermiş kiber insidentlərin araşdırılması, insidentə aid rəqəmsal məlumatların kompüterlər, telefonlar, şəbəkələr və bulud servislərindən toplanılması və analizidir.

Rəqəmsal məhkəmə ekspertizasının addımları:

İdentifikasiya. Rəqəmsal sübutlar müəyyən edilir və sistemin təhlükəsizliyi təmin olunur;
Qorunma. Məlumatlar təcrid edilir və qorunur;
Analiz. Məlumatlar birləşdirilir və tapılan sübutlara əsasən nəticə çıxarılır;
Sənədləşdirmə. Analiz əsasında əldə olunan məlumatların hesabatı çıxarılır.

Kibertəhlükəsizlik maarifləndirmə xidməti korporativ kiber maarifləndirmə təlimlərinin təşkilidir. Kiber təhlükəsizlik məlumatlılığı, istifadəçilərə təhlükə və risklərlə qarşılaşdıqda addımlarını düzgün atmaq üçün yol göstərməyə çalışır.

Kiber maarifləndirmə, şübhəsiz ki, daha çox təhdidlərin qarşısını almağa kömək edəcəkdir. E-poçt vasitəsilə ötürülən təhdidlər həmişə insanları hədəf alaraq onları linklərə klikləmək, qoşmaları açmaq ya da təhlükəsizlik divarının aşılmasında istifadə edilən parollar və şəxsi məlumatları paylaşmağa tərəf istiqamətləndirir.

Ən son kibertəhlükəsizlik alətlərinə və ya ən mürəkkəb kibertəhlükəsizlik strategiyalarına nə qədər sərmayə qoymağınızın əhəmiyyəti yoxdur. Əgər istifadəçiləriniz şübhəli linki və ya saxta e-poçtu müəyyənləşdirə bilmirlərsə, müdafiənin zəifləməsi ehtimalı yüksəkdir.

Kibertəhlükəsizlik həllərinin tətbiqi və dizaynı xidməti şəbəkə, sistem və tətbiq təhlükəsizliyi həllərinin quraşdırılması, konfiqurasiya edilməsi həmçinin, təhlükəsiz infrastruktur dizaynıdır.

İnformasiya sisteminin sərhədlərini aydın şəkildə müəyyənləşdirin. Müəyyən edilmiş sərhəd ilə şirkət, sistem məlumatlarını saxlayan və ya emal edən bütün qurumların aydın və dəqiq təmsilçiliyinə sahib olmalıdır.

Kibertəhlükəsizlik statistikasına görə, kiber hücumların bir çoxu daxildən gerçəkləşir. Bu səbəbdən də daxili təhdidlərin qarşısı alınmalıdır.

Security Audit müəssisənin informasiya sistemlərinin müəyyən edilmiş meyarlar toplusu ilə müqayisə edilərək sistematik qiymətləndirilməsi xidmətidir.

Təhlükəsizlik auditləri iki yerə ayrılır: daxili və xarici auditlər.

Daxili auditdə şirkət öz resurslarından və daxili audit şöbəsindən faydalanır.
Xarici audit zamanı isə kənar bir təşkilat cəlb olunur. Şirkətin sənaye standartlarına və dövlət qaydalarına uyğunluğu təsdiqlənərkən də xarici auditdən istifadə olunur.

Kibertəhlükəsizlik konsultasiyası - Müxtəlif kibertəhlükəsizlik xidmətləri barədə konsultasiyadır.

Bir çox müəssisələr gündəlik olaraq müxtəlif kibertəhlükəsizlik problemləri ilə qarşılaşa bilir. Bu problemlərin bəziləri kiçik miqyasda olsa da, bəzilərinin həlli ətraflı araşdırma, yüksək analitika və ekspertiza tələb edir. Bizim yüksək ixtisaslı mütəxəssislərimiz tərəfindən təqdim etdiyimiz konsultasiya xidmətlərimiz problemlərin qısa zamanda həllini təklif edir.

Əlavə olaraq, yeni qurulacaq sistemlərin, şəbəkələrin və hazırlanan proqram təminatlarının təhlükəsizlik tələblərinə uyğun arxitekturasının qurulması, mövcud təhlükəsizlik mexanizmlərinə ediləcək dəyişikliklərin müzakirəsi də bu xidmətə daxildir.